Im letschde Johr, ich konn´s eisch sache,
hot sich im Lond einisches zugetrache.
Die Welt wärd net ofacher, des isch gewiss,
wonn isch drodenk, dud ma weh moi Gebiss.
In Neilosse unn uff da gonze Welt,
isch wirklich nätt alles zum Beschde bestellt.

Doch, ihr liewe Leit, froogt nett long “Warum?“,
die Mensche sinn so, do kumm´sch nätt drum rum.
unn monsches kummt ma komisch vor,
drum muss isch eisch sache
do brauch´sch Humor.

Wonn isch morjeds uffschteh in da Frieh,
dess Kreiz dud ma weh unn aa moi Knie,
donn geh isch zum Doktor unn sag, isch brauch ä Kur
unn Tablette unn Salwe unn aa was fa moi gudi Figur,
donn sescht der, ha do brauch´sch gar nätt kumme,
die Kronkenkassebosse hänn sisch dess bissel, was do isch, schunn selwa gnumme,
fa ihr große Gehälter unn fa unnetische Färz,
do bleibt ma die Luft weg, do klopft ma moi Herz,
dess kummt ma alles gonz komisch vor,
do bleibt ma bloß ohns,
do brauch´sch Humor.

Da Schröder hot letscht Johr gsaat, er will nimmi,
unn glaabt ma´s Leit, isch waas nätt wie,
gab´s donn ä Misstrauensvotum wie noch nie.
Die, wu g´wollt hänn, dass a bleibt,
hänn zuschdimme misse,dass ma ´n vertreibt.
Jetzt hot a da Salat, jetzt muss a sühne,
Unn soi Brötchen bei da arme Russe vadiene .

Dess kummt demm alles komisch vor
do bleibt ´m blooß oons:
Do brauch´sch Humor.

Die Politik im allgemoine,
erschließt sich nett fa jedermann.
Doch wenn ma in Neilosse will wissend erschoine,
kummt ma schnell on Grenze an.
Schunn long war dem Gemoinderat klar,
dass dess Gebiet um da alde Bohnhof zu bebaue war.
Alles war in da schbrischwerdlich droggene Diescher,
do hot´s pletzlisch g´heese, nix isch´s, mir hänn än bessere Riecher.
Ä Realschul muss her, ä gonz bsunnas heilischi dazu,
unn dess hänn die g´saat, die vunn chrischtlische Grundsätz schunscht gar nix halte du.
Noch siwwe Johr isch ma jetzt Gott sei Dank schlauer,
dess gonze Getees isch endlich vorbei,
jetzt kumme ball die Supermarktbauer.
Die Leit gehne hie unn kaafe dort ei.

Trotz allem kummt ma dess ziemlich komisch vor
Um dess zu vaschteh,
do brauch´sch Humor.

Wonn ma jetzt grad bei chrischtlisch sinn,
gibt´s noch wass, wu isch ä bissel kritisch bin.
Die Evangele hänn schwer inveschdiert,
unn mitte im Ort ä neies Zentrum inschdalliert.
Dess war ä Theater, isch muss eisch berischte,
bis die Leit kapiert hänn, was die wolle, die Evangelischte.
Unn wie imma hänn die Leit om meischde die Gosch uffgerisse,
die später in dess Haus gar nätt noi gähne misse.
Die hänn schoinbar imma noch nätt kabiert,
dass dess 21. Johrhunnert jetzt regiert.
Unn dass der, wu ä Ohnung hott, iwwa so was bestimme soll
unn nett jemond, wu moont, wer´s Geld hott, isch gonz toll.

Dess kummt ma in Neilosse schunn gonz bekonnt vor
Awwa aa do sag isch meischtens:
Do brauch´sch Humor.

Bei wass onnerem kämpfe aa ä paar um da Sieg,
dess isch da Platz fa ä Denkmal vumm Krieg.
S´war alles geritzt, dess kään´t heit schunn stäh,
uff´m Friedhof, wu´s hieg´heert, do wär´s schää.
Uff omol, ä Wunna, do hänn ogeblich ä paar hunnat entdeckt,
dass ma mitte im Ort - unn dess unentwegt,
seine doode Helde gedenke soll.
Do froog isch misch,
warum isch die Aussegnungshall om Volkstrauertag eigentlich nett voll ?
Aa doo merkt ma leida, dass ess halt doch noch ä paar gibt, die´s denke nett kenne
unn-weil´s bequema isch- liewa ämme Holzkopf nochrenne.

Trotz allem hofft ma, da Vaschdond geht irgendwonn ämol vor
Biss dess soweit isch:
Do brauch´sch Humor.

In Neilosse gibt´s än Woihnachtsmarkt jedes Jahr
Unn ihr wisst jo aa all, wie schää´s dort immer war.
Doch neierdings, do konn da´s passiere,
wenn friedlich do hock´sch unn dusch vor dich hiesinniere,
dass aus heiterem Himmel än Mensch vor da steht
unn ungeniert die recht Hond hochhebt.
Du weesch gar net, wir dir´s uff omol wärd,
do ruft der „Sieg Heil“ und nimmond fühlt sich g´steert.
Unn wenn sich doch ooner g´steert fiehlt, ihr kennt ma´s glaawe,
uff denn sterze sich oschließend all wie die Raawe.
„Wie konn man sich do so ärjere driwwa,
der wollt bloß „Ski heil“ saache weil a monchmol mit´m Rudel fuhr nach Eeschtreich niwwa.
außerdem isch a alt unn b´soffe war a aa,
ma wees doch wie a isch, unn dem soi armi Fraa!“
Isch konn eich sage, dess war des dimmschte im letschte Johr,
basst uff, wenn´s widda ofängt, seid imma gonz Ohr.

Dess kummt ma nämlich gar nätt so komisch vor.
Fascht konn ich´s nätt sache :
Do brauch´sch Humor.

Ä neies Johr steht uns jetzt in´s Haus.
Wie ihr g´sehe habbt, geht nätt immer alles gut aus.
Doch s´ísch wie´s isch, ma erlebt viel seltsame Sache,
unn monchmol konn ma sogar noch driwwa lache.
Isch hoff fa eisch unn aa fa misch,
dasses meischte zu verkrafte isch.
Unn kummt eisch mansches komisch vor,
Mit meim Motto geht´s besser:
„Do brauch´sch Humor“

Burgl