Im letschde Johr, ich konn´s eisch sache,
hot sich im Lond einisches zugedraache.
Die Welt wärd net oofacher, des isch gewiss,
wonn isch drodenk, dud ma weh moi Gebiss.
In Neilosse unn uff da gonze Welt,
isch wirklich nätt alles zum Beschde bestellt.

Doch, ihr liewe Leit, froogt nätt long “Warum?“,
die Mensche sinn so, do kumm´sch nätt drum rum.

Unn monsches kummt ma komisch vor,
drum muss isch eisch sache:
Do brauch´sch Humor.

Ihr erinnert eisch vielleischt on moi Rädd vum leddschde Johr:
Isch hab sie noch ämol g´lese unn es isch wirklisch wohr,
verännert hott sich nätt viel- im Geeschedeil,
s´meischde isch schlimmer unn gar nix isch heil.

Fonge ma mol mit da Kronkereform oo.
Do händle sie immer noch, do grigsch graue Hoor.
Rauskumme isch nix Neies, bloß dass die Beiträg steige,
beim Facharzt brauch´sch disch gar nimmi zeige,
wenn was hosch, un´s duud weh, grigsch erscht änn Termin,
wonn´s nimmi weh duud, so spare sie in Berlin.
Wonn´s nimmi weh duud, lach isch vielleicht mol driwwa
unn bis dorthie nämm ich ma halt vor,
s´wärd ball bessa,
awwa do brauch´sch Humor.

Ä onneres Thema isch mir aa nätt geheuer,
des isch die höhere Mehrwertsteuer.
Isch wääs zwar wie Ihr alle im Saal,
da Fiskus braucht Geld, er hott koo onneri Wahl.
Awwa oons misst nätt soi, do stimmt Ihr mir zu
Dass Pornoheftlin und Fudda fa Katz, Hund und Kuh
Wennischa Steier koschte soll
Wie Babynahrung und Medikamente - do guggt a - jawoll.
Isch hab ma iwwalegt on was des ligge konn,
dass ma so was in Berlin beschliesst ohne Pardon.
Hänn die all koo Kinner unn bloß Hunde unn Katze
Unn dahoom die besagte Heftlin unna da Matratze?
Des muss sich ännere, do streite mir davor,
bis es donn soweit isch,
do brauch´sch Humor.

In Bayern henn sie seit ä paar Woche da Salat:
Ä mudischi Fraa hot denne poliddische Holzkepp mol gsaat
Dass die meischde Leit da Stoiber nimmi wolle.
Unn seitdem geht da Seehofer dort so rischtisch in die Volle.
Eigentlich misst awwa dort jetzt mol ä Fraa ons Ruder kumme,
in Amerika unn Berlin wärre sie doch aa ziemlich ernscht genumme.
Bei da Schuhplattler dauert´s awwa glaab isch noch ä paar Johr,
doo brauch´sch halt Geduld
unn do brauch´sch Humor.

Mir bleiwe im Ländle nätt weit vunn Neilosse
Do hänn sie in Schwetzingen da OB abgeschosse.
Dess hott erscht kooner glaawe wolle,
om allerwennigschde da Noochfolger Junker, der dolle.
Die Schwetzinger hänn da Kappenstein gonz arg bedauert zwar,
doch glaab isch facht, dass dess vunn demm Absicht war.
Die MVV war nämlisch gonz schää schnell
Unn hott fa da Ex-OB ä gonz neii Stell.
Do fraaida sich wie än Held
Unn vadient jetzt dobbelt so viel Geld.
Dess kummt ma gonz schää pfiffig vor.
Der Schwetzinger Bürger säscht:
Do brauch´sch Humor.

Ä Thema vunn leddscht Johr isch immer noch aktuell:
Des Denkmal vumm Krieg schdeht immer noch nätt onn soinere Stell.
Do war war los, isch konn´s eisch saache,
ä paar gonz Dolle hänn sisch mit dem Gedonke gedraache,
dänn Stoo genau vor die Käärsch zu schdelle
warum aa imma, s´gibt vaschiedene Quelle.
Dodavor hott ma aa noch unnaschreiwe solle,
uhne zu wisse, wass die onnere Vorschläg wolle.
Isch hab mich gar nimmi oikaafe getraut,
wonn da dauernd jemond uff die Schulda haut
und vor doiner Nas mit´m gelwe Zettel winkt
und dich beinah zum Unnerschreiwe zwingt.
Wonn nätt g´wollt hosch, hänn sie dich dahoom beglickt
unn kräftisch uff die Tränedries gedriggt.
Sie hänn jetzt ihr´n Wille, da Stoo bleibt im Ort.
Egal wie a dort aussieht, Hauptsach er kummt nätt fort.
Isch sag´s noch ämol: Der kähnt schunn längschd stäh
uff´m Friedhof, wu a hieghärt, do wär a schää.
Awwa donn häädä ma jo koon Grund zum Zoffe
unn die umliegende Gemeinde missde uff onnere Dummheide aus Neilosse hoffe.
Unn hosch disch blamiert, unn´s kummt da peinlich vor
bleibt da nur oons:
Do brauch´sch Humor.

Wonn isch ma jetzt noch im Geheime iwwaleg
wer hinna dämm gonze Drama eigentlich steht,
do konn isch eigentlisch gar nimmi lache.
Derjenische will domit ablengge vunn gonz onnere Sache.
Mit Bürgerhilfe unn zum Gebortsdaag ä Fläschel Woi,
konn doch nätt alles vergesse soi.
Unn oons isch gewiss, do bin ich ma nätt zu foi,
vunn oom wu „Sieg Heil“ ruft unn da Arm hebt zum Gruß
loss isch ma nätt saache, wie´s in Neilosse aussehe muss.
Isch konn´s fascht nätt saache, unn doch isch´s wohr,
mir känne monschen nimmi ännere
unn do brauch´sch Humor.

Ä neies Johr steht uns jetzt in´s Haus.
Wie ihr g´sehe habbt, geht nätt immer alles gut aus.
Doch s´ísch wie´s isch, ma erlebt viel seltsame Sache,
unn monschmol konn ma sogar noch driwwa lache.
Isch hoff fa eisch unn aa fa misch,
dass es meischde zu verkrafte isch.
Unn kummt eisch mansches komisch vor,
Mit meim Motto geht´s besser:
„Do brauch´sch Humor“